2025 թվականի ապրիլի 1-ին ուժի մեջ է մտել 2024 թվականի դեկտեմբերի 5-ի «Հայաստանի Հանրապետության ընտրական օրենսգրքում փոփոխություններ և լրացումներ կատարելու մասին» ՀՀ սահմանադրական օրենքը (այսուհետ՝ Օրենք)։ Միաժամանակ, հարկ ենք համարում նշել, որ նույն Օրենքի 81-րդ հոդվածի 5-րդ մասի համաձայն՝ «Ընտրությունների նշանակման և անցկացման վերաբերյալ սույն օրենքով նախատեսվող նոր կարգավորումները տարածվում են սույն օրենքն ուժի մեջ մտնելուց հետո նշանակված հերթական, արտահերթ ընտրությունների, ինչպես նաև դրանց արդյունքով կազմակերպվող նոր հերթական, նոր ընտրությունների, վերաքվեարկության և ընտրությունների երկրորդ փուլի վրա։ Սույն օրենքն ուժի մեջ մտնելուց հետո՝ մինչև դրա ուժի մեջ մտնելը նշանակված հերթական, արտահերթ ընտրությունների, ինչպես նաև դրանց արդյունքում կազմակերպվող նոր հերթական, նոր ընտրությունների, վերաքվեարկության և ընտրությունների երկրորդ փուլի վրա տարածվում են մինչև սույն օրենքն ուժի մեջ մտնելը ընտրական գործընթացների վերաբերյալ գործող կարգավորումները։»։
Հաշվի առնելով այն հանգամանքը, որ Գյումրի և Փարաքար համայնքների ավագանիների 2025 թվականի մարտի 30-ի արտահերթ ընտրությունները նշանակվել են մինչև Օրենքի ուժի մեջ մտնելը, ուստի, տեղական ինքնակառավարման մարմինների 2025 թվականի մարտի 30-ի արտահերթ ընտրությունների արդյունքների ամփոփման գործընթացների նկատմամբ կիրառելի են մինչև Օրենքի ուժի մեջ մտնելը գործող «Հայաստանի Հանրապետության ընտրական օրենսգիրք» ՀՀ սահմանադրական օրենքի կարգավորումները։